Алексовски двоен победник на Црна Река Опен 2026

Младиот македонски тенисер Марко Алексовски (прв носител) на убедлив начин го одигра турнирот во Кавадарци „Црна Река Опен 2026“ и триумфираше и во сингл и во двојки. Турнирот беше од категорија 3 за тенисери и тенисерки до 16 години.

Во финалето Алексовски го совлада Николај Петерсен од Данска, втор носител со 2-0 во сетови (63 62). Најтешкиот меч македонскиот тенисер го одигра во второто коло против Џери Куцојоргос од Грција и успеа да го совлада со пресврт 2-1 во сетови, откако ривалот го доби првиот сет со 6:2 во гемови, а Марко возврати со истиот резултат во вториот сет, додека во решавачкиот беше 7:5 за Алексовски.

Во четвртфиналето совладан беше Никола Павлов од Бугарија со 2-0 во сетови (63 62), а во полуфиналето Лазаре Сутијашвили од Грузија со 2-0 во сетови (62 62).

Во игра на двојки Алексовски и Петерсен во финалето ги победија Џери Куцојоргос и Космас Дракос од Грција со 2-0 во сетови (62 76(7).

На турнирот настапија уште неколку наши тенисери и тенисерки, a четвртфинале играа: Деа Крстевска и Анастасија Арсовска кај девојчињата и Селим Јилдиз кај момчињата.

Инаку, Алексовски кон крајот на месец мај беше полуфиналист во сингл и двојки на турнир од категорија 1 во Италија (Толентино).

Следниот тениски турнир во Македонија ќе биде ИТФ фјучрсот во Скопје од 29.јуни до 5.јули.